Fratsen staken

 

Staken is schienboar `t nieuwe woord veur efkes lekker `n dagje niks doon. Stakende treinvolk, stakende onderwiezers,staken veur `t klimaat. Ik krieg zo `t idee dat as ie `t efkes neet mear wet dat ie dan mot goan staken. Ik zag de kinder lopen met spandeuke; CO2 weg ermee. Ze hadden ok op `t dook kunnen zetten; `n lekker dagje oet is altied goed.  Ie maakt mien neet wies dat kinder wakker ligt snachts van `t klimaat. Zit ie lekker met de pantoffels in de banke kump oe dochter in paniek oet berre en reart; ik kan neet sloapen deur alle CO2 of ik bun bange dat ik verzoep deur de smeltende ieskappe. Kan toch neet woar wean, dan maak ik mien earder  zurgen oaver de iesbearn die dan disse kante oet komp. In de wolvenkuttels hebt de deskundigen al zitten graaien moar as der argens  iesbearkuttels zollen liggen dan wurdt `t wal tied um in te griepen. `t klimaat kunne wij leu neet zovulle an doon as der morgen ne groot`n vulkaanoetbarsting kump kunne wij der allenig moar met de hande in de tesse bie goan stoan kieken. De natuur geet zien eigen gang en truk zich van ons gemas neet vulle an. De natuur staakt nooit en is elke dag wear `n verrassing en dat is denk ik `t grootste probleem. Wij wilt tegenweurdig alles zelf in de hand hemmen en hollen. Moar as der `n fikse buie kump net as ie noar boeten hen wilt dan heb ie oe doar met te verhollen. Veural deur de mobieltjes meen e wij dat wij alles wet oaver wat dan ok en wie dan ok. Ik vroag mien wal eens af hoe wij vrogger zonder heb e kunt. Lest op de verjoardag zat der eene van wiet in de zestig nog constant ondertied op zien mobiel te loeren. Ik zeg zo heb ie storingsdienst? Nea zeg he ik heb joh allange pensioen. Ik zeg wat zit ie dan steeds te loeren?? Ik heb der `n camera op an e slotten en noe wil ik wal eens zeen wie soavonds altied dat leste stukske wors opet.