About Twan Stroet

Deze auteur heeft nog geen informatie verstrekt.
So far Twan Stroet has created 20 blog entries.

Fratsen – Klokken Luuden

2019-04-11T19:17:27+02:00

Heb ie `t artikel ok e leazen oaver de klokkenluuders? Ik dach earst: het geet oaver de koster van de karke. Noa alle gedoo van misbroek wilt dee de klokken neet mear loaten luuden. Moar ik had `t glad mis: het gung oaver `t hoes van de klokkenluuders. Ik wis ja gaar neet dat `t bestond.

Dat is `n hoes, doar kun ie anoniem melden as der iets neet in den hoak is. Dat gebeurt dus zo anoniem dat ze in drie joar tied van de honderden meldingen gin enkele melding bunt noa e goane. Zo blif ieder mooi anoniem, het blik dat der onkundig volk an `t wark is e zat. Zeg moar: leu dee neet mear good hun beste deden, kwammen bie `t hoes van de klokkenluuders um ze van stroate af te hollen.

Het hoes hef al negen miljoen euro verbroekt en kats niks op e lost. Te gek veur weurde, want `t bunt natuurlijk wal wear onze belastingcenten. Ie zollen ze toch an hun eigen klokkenspel ophangen en loaten bungelen?

Moar wij blieft natuurlijk trots um hier in den Achterhook te wean en te leaven. Met name te leaven want hier in Hoarle steet `t duurste crematorium van Nederland. Te gek veur weurde natuurlijk, want as wij ons leste tochtje maakt, zal `t ons toch `n zorg wean of dat in een mooie umgeving gebeurt?

In de krante stond letterlijk: cremeren is er niet goedkoop, maar dan heb je wel wat. Ie kunt der noatied zelfs stamppot etten of bitterballen. Doar hef degene woar `t umme geet natuurlijk niks mear an. Ie zollen tenminste raar opkieken as an `t ende van de ceremonie de kiste iets los zol goan en degene zol zeggen: bewaar ie mien ok `n stukske wors.

Fratsen – Klokken Luuden2019-04-11T19:17:27+02:00

Het is een feest om juf of meester te zijn!

2019-04-02T17:11:43+02:00

Het motto van gisteren op de Sint Jozef school in Rietmolen was: Het is een feest om juf of meester te zijn! Bij een feestje hoort natuurlijk taart. In de pauze werden we verrast met een heerlijke slagroomtaart van bakkerij Stroet voor de héle school! We hebben er met z’n allen lekker van gesmuld! Bakkerij Stroet: bedankt! Ouders die geholpen hebben: bedankt!

Het is een feest om juf of meester te zijn!2019-04-02T17:11:43+02:00

Fratsen – Lieke Zetten

2019-04-01T07:25:19+02:00

Fratsen   lieke zetten

 

Afgelopen weekend was `t wear zo wiet de tied mos verzat worden. Altied een gemas mot `t noe veuroet of achteroet. Annie uut Hengevelde schreeuwt al tieden dat wij dat neet mear wilt moar zo vlot geet dat neet in de politiek. Ja as de belasting verheugd wurdt van 6 noar 9 procent dan kan dat vlot, moar zoiets simpels as de zommertied afschaffen dat mot joaren duur`n. Het plan is um der in 2012 met te stoppen, let wel `t plan dus der is nog niks zeker wat een stelletje olde wieve bunt dat toch doar in `t Europese parlement.

Oaverleggen,proaten good geld verdeen`n veur eigen bokse moar wat beslissen ho moar. Kiek moar hoe ze zit de gengelen met de Brexit, as you dit ,as you dat, ondertussen krieg ie van `t gedram `n zwear an `t gat. Dee Engelsen bunt toch altied al anders e wes kiek moar an welke kante van de weg at ze ried. Ik blief `t lastig vinden in dee auto`s, met `t instappen zeet ie `t al, `t stuur zit an de verkearde kante dus ie mot steeds veur oe bierieder henreken um op de weg te blieven. Allemoale lastige dinge moar ok hier korter bie thoes bunt der lastige dinge.

Facebook is ok zon lastig ding dat vundt veural de veurzitter van `t CDA. Zet ie wat op de pagina van `t CDA  en `t steet de veurzitter neet an dan heb ie grote kans dat he bie oe an hoes kump um te vroagen of ie `t der wear of wilt halen. Ze bunt noe an `t massen oaver `n nieuwe wetholder moar doar meugt de leden zich eigenlijk neet met bemeuien. Dus ze bestoat nog steeds de achterkamertjes. Moar ja dat wisse wij eigenlijk ok wal want `t gemeentehoes is vuls te groot moar deur alle achterkamertjes eigenlijk toch nog te krap.

Fratsen – Lieke Zetten2019-04-01T07:25:19+02:00

Fratsen – Lente

2019-03-22T09:46:52+02:00

Fratsen lente

 

De lente is alwear begonnen een van de mooiste joargetieden, noa al `t gedram van de verkiezingen is dat `n hele opluchting.

Ik had de boek der wal vol van, van al dee slijmende politici dee oe van alles wies maakt. Noe is der wear `n nieuwe partie op e stoan en den krig ja zowat de meeste stemmen. Dat is toch een teken an de wand veur de gevestigde orde dat ze neet good gengs bunt. Zo noe en dan mot ie efkes met de harke deur het land um wear liekegeid te kriegen. Efkes alles op de schuppe um wear een vruchtboar land te kriegen. Ieder is der helemoale kloar met.

Het milieu dit het milieu dat extra beveiliging oaveral. Leu dee `t gewear pakt en mekeare daale scheet. Wat een armoo is `t an `t worden. Dit mot toch eigenlijk met ons verstand neet mear meugelijk wean. Het hult nooit op hoe wies at wij ok denkt te wean. Hoppen dat de lente de leu wear tot bezinning brech.

De lente; alles kump wear in knop en de earste beume hebt alwear blad en dat geet allemoale vanzelf prachtig toch. Zo was der vergangen wekke ok `n old menneke zien veurtuin an `t ummemaken. Het gong allemoale arg langzaam en ziene vrouwe werd der biekans hoaste kriebelig van. Toen he soavonds bie de vrouwe veur de heard zat zeg de vrouwe: foj, foj wat duurt `t toch dat ummemaken.  Joa zeg `t menneke moar ik wordt steeds af eleid. Af eleid? zeg de vrouwe . Joa zeg `t menneke der komp zovulle mooie vrouwleu langs fietsen en dan mag ik gearne efkes kieken. Wat noe zeg de vrouwe bun ik neet good genog mear. Joa joa zeg `t menneke moar joa `n olden geit as ikke lust ok zo noe en dan nog wal eens `n greun bleadje.

Fratsen – Lente2019-03-22T09:46:52+02:00

Fratsen – Noar Eibargen

2019-03-15T18:03:07+02:00

Onlangs was ik op bezeuk in Eibargen bie de Huve, um doar ne middag te verzurgen veur de Zonnebloem. Der was mien e zeg der kump meestal zo’n veartig man, kom ik de zaale in zit der zeuventig man en vrouwleu. Prachtig, prachtig, hoe mear zielen, hoe mear vreugde, zolle wij moar zeggen. Ik heb hearlijk kunnen kuieren oaver de bakkerieje en natuurlijke de fratsen dee ik hier altied schrief.

Noatied met `t opruum`n zat der ne vrouwe den rollater midden veur mien near en zei: stop ie eens efkes kearltje, dat wat ie allemoale zeg heb vanmiddag is neet woar. Ze kek der heel ernstig bie. Ik had `t e had oaver cake met rum derin en had e zeg: maak oe moar neet bange dat ie zat noar hoes hen goat, want de alchohol verdampt bie `t bakken. Doar was de dame `t neet met ens en ze had geliek; neet alle alchohol verdampt met `t bakken. Der blif nog een kleddeke oaver. Noe mot ie dan wal heel vulle rumcake etten um der zat van te wodden, moar de dame had geliek en ik had `t mis. `n Goeie lear veur de volgende kear.

Noe heurde ik van de wekke nog een mooi verhaal oaver ne darter den noa de training luk vulle alchohol gebroekt had en natuurlijk vul te laate thoeskwam. Hij wol `t neet wetten veur de vrouwe, dus he had zich op de gang al oet e kleed. Achterears ging he op berre an, moch de vrouwe dan wakker worden dan zol he zeggen ik mot nog efkes noar de pot hen. Noe kwam he bie `t achteroet lopen an `t vallen, tegen `t tv kastje an en de televisie veel boaven op hum. De vrouwe dreien zich en kneuren wat in berre.

Noa een kwartear zat he de televisie terugge en ging hearlijk liggen sloapen. Zo dach he, de vrouwe hef niks vernommen.

De andere aovond goat ze teglieke noar berre en de vrouwe wol nog efkes tv kieken, potdimme zeg ze hoe is dat noe meugelijk de televisie steet opkop…

Fratsen – Noar Eibargen2019-03-15T18:03:07+02:00

Fratsen – Staken

2019-03-15T18:01:36+02:00

Fratsen staken

 

Staken is schienboar `t nieuwe woord veur efkes lekker `n dagje niks doon. Stakende treinvolk, stakende onderwiezers,staken veur `t klimaat. Ik krieg zo `t idee dat as ie `t efkes neet mear wet dat ie dan mot goan staken. Ik zag de kinder lopen met spandeuke; CO2 weg ermee. Ze hadden ok op `t dook kunnen zetten; `n lekker dagje oet is altied goed.  Ie maakt mien neet wies dat kinder wakker ligt snachts van `t klimaat. Zit ie lekker met de pantoffels in de banke kump oe dochter in paniek oet berre en reart; ik kan neet sloapen deur alle CO2 of ik bun bange dat ik verzoep deur de smeltende ieskappe. Kan toch neet woar wean, dan maak ik mien earder  zurgen oaver de iesbearn die dan disse kante oet komp. In de wolvenkuttels hebt de deskundigen al zitten graaien moar as der argens  iesbearkuttels zollen liggen dan wurdt `t wal tied um in te griepen. `t klimaat kunne wij leu neet zovulle an doon as der morgen ne groot`n vulkaanoetbarsting kump kunne wij der allenig moar met de hande in de tesse bie goan stoan kieken. De natuur geet zien eigen gang en truk zich van ons gemas neet vulle an. De natuur staakt nooit en is elke dag wear `n verrassing en dat is denk ik `t grootste probleem. Wij wilt tegenweurdig alles zelf in de hand hemmen en hollen. Moar as der `n fikse buie kump net as ie noar boeten hen wilt dan heb ie oe doar met te verhollen. Veural deur de mobieltjes meen e wij dat wij alles wet oaver wat dan ok en wie dan ok. Ik vroag mien wal eens af hoe wij vrogger zonder heb e kunt. Lest op de verjoardag zat der eene van wiet in de zestig nog constant ondertied op zien mobiel te loeren. Ik zeg zo heb ie storingsdienst? Nea zeg he ik heb joh allange pensioen. Ik zeg wat zit ie dan steeds te loeren?? Ik heb der `n camera op an e slotten en noe wil ik wal eens zeen wie soavonds altied dat leste stukske wors opet.

Fratsen – Staken2019-03-15T18:01:36+02:00